Պատահական չէ, որ Ադրբեջանը հենց այսօրն է ընտրել Եվլախում հանդիպման համար. նախատեսված օպերացիան էլ այնպես է նախատեսվել, որ մինչեւ սեպտեմբերի 21-ը ավարտված լինի եւ այդ բանակցությունները հենց այդ օրը տեղի ունենան: Այս մասին այսօր՝ սեպտեմբերի 21-ին, «Եռաբլուր» պանթեոնում լրագրողների հետ զրույցում նշեց ԱԺ «Պատիվ ունեմ» խմբակցության պատգամավոր Տիգրան Աբրահամյանը:

«Ադրբեջանը փորձում է ոչնչացնել բոլոր այն խորհրդանիշները, որոնք Հայաստանի ու Արցախի համար բնութագրել են անկախություն, ազատություն եւ անվտանգություն: Այսօրվա հանդիպումը հենց այս օրը կազմակերպելը նպատակ ունի բարոյապես ոչնչացնելու այն, ինչը այս իշխանությունները արդեն երկար ժամանակ անում են»,-ասաց նա:

Անդրադառնալով բանակցություններին բուն բովանդակությանը, ընդդիմադիր պատգամավորն ասաց. «Որքան ես եմ տեղյակ, այդ բանակցությունները մի քանի հարթությունով են տեղի ունենալու եւ միայն Եվլախում չեն տեղի ունենալու: Այս իրավիճակում մի կողմից թվում է, թե ամեն ինչ ակնհայտ է, թե ինչ է տեղի ունենալու, մյուս կողմից դետալային առումով խնդիր կա ճշտելու, թե ինչ է լինելու:

Այս պահին մարտադաշտում մեծ թվով մեր հերոսների մարմիններ կան, որոնք դուրս չեն բերվել: Այսինքն այդ բանակցություններում քննարկվելու են մարդասիրական խնդիրներից մինչեւ Արցախի ապագայի հետ կապված որոշակի հստակություններ: Ինձ համար դեռ հստակ չէ, թե ինչ ճանապարհ է ընտրվելու:

Այստեղ խնդիրն այն չէ, թե ինչ է մտածում Արցախի իշխանությունը, շատ կարեւոր է հասկանալ, թե ինչ է մտածում Արցախում ապրող մարդը, ով 44-օրյա պատերազմից հետո մտածում էր, որ պատերազմի այդ փուլն ավարտվել է եւ իրենց անվտանգության հարցը գոնե նվազագույն առումով լուծված է: Բայց ժամանակը ցույց տվեց, որ ռուսական զորակազմի ներկայությունը չզսպեց Ադրբեջանին ռազմական գործողություններ իրականացնելուն:

Ժամանակը ցույց տվեց, որ ՀՀ իշխանությունները Արցախում տեղի ունեցողը բացառապես դիտարկեցին որպես Ադրբեջանի ներքին հարց եւ որեւէ ձեւով չմիջամտեին: Պատահական չէ, որ երեկ Ադրբեջանի նախագահն իր հոգունակության խոսքն էր հայտնում ՀՀ իշխանություններին ու Նիկոլ Փաշինյանին»:

Անդրադառնալով նրան, որ սեղանին դրված է Արցախի պետական ինտիտուտների կազմալուծման հարցը եւ այդ դեպքում հարց է ծագում, թե ինչպես է կառավարում իրականացվելու Արցախում. «Այս իրավիճակում պետք է հասկանալ, թե ով ինչ ֆունկցիա է ստանձնելու: Ռուսական զորախումբը այս իրավիճակում ունենալո՞ւ է ֆունկցիաներ, թե՞ պարզապես դուրս է գալու: Կան որոշակի պայմանավորվածություններ ռուսական եւ ադրբեջանական կողմերի միջեւ, ինչի վերաբերյալ մենք դեռեւս տեղեկություններ չունենք»: