Վարդանյանն արդեն Բաքվում է, սարսափելի է պատկերացնել՝ ինչ ճակատագիր է նրան սպասվում. Սիմոնյան

RT հեռուստաալիքի գլխավոր խմբագիր Մարգարիտա Սիմոնյանն անդրադարձել է Ռուբեն Վարդանյանի ձերբակալությանը։

Նա անդրադարձել է Ռուբեն Վարդանյանի ձերբակալությանը՝ գրելով. «Սարսափելի է պատկերացնել, թե ինչ ճակատագիր է նրան սպասվում։ Եվ նա՝ համաշխարհային մակարդակի միլիարդատերը, Ջորջ Քլունիի և բոլորի գործատուն, դա արել է կամավոր»:

Ռուսական գործող իշխանություններին անդավաճան երկրպագու Մարգարիտա Սիմոնյանը ապա հիշատակել է այն, որ Ռուբեն Վարդանյանը նախ Լոնդոնում մեծացած իր որդուն է ուղարկել Լեռնային Ղարաբաղ՝ թեժ պատերազմի մեջ, հետո՝ ինքնուրույն գնացել։

«Նա հրաժարվեց ամեն ինչից, այդ թվում՝ քաղաքացիությունից ու հեռացավ։ Ակնհայտ է, որ տասնամյակներ աներևակայելի կապիտալ վաստակելուց, օտարերկրյա ազդեցիկ ընկերներից, փառատոներում հոտնկայս ծափահարություններից հետո նրա կյանքում ոչ մի շահ չմնաց, բացի իր ժողովրդի ազգային շահերից։ Բոլորն այս օրերին, երբ արդեն ամեն ինչ պարզ էր, զանգահարում էին Ռուբենին, աղաչում էին, որ վերադառնա՝ օգնություն առաջարկելով։ Նա ասաց. «Ես կլինեմ այնտեղ, որտեղ իմ ժողովուրդն է»։ Եվ նա մնաց»,- Վարդանյանի խոսքերն է մեջբերել Սիմոնյանը: