Ֆրանսիան 7 մլն եվրո և բժշկական պարագաներ կուղարկի ԼՂ-ից տեղահանվածներին

Ֆրանսիայի ԱԳՆ-ն հայտնել է, որ Ֆրանսիան վճռականորեն աջակցում է Հայաստանին, ինչպես նաև Լեռնային Ղարաբաղից եկած փախստականներին, որոնք տասնյակ հազարներով ստիպված են եղել լքել իրենց հողերն ու տները Ադրբեջանի կողմից ձեռնարկված ռազմական հարձակումից և իննամսյա անօրինական շրջափակումից հետո․

«Ադրբեջանը պետք է վերականգնի մարդասիրական անխոչընդոտ մուտքը հատկապես Հայաստանից ու ՄԱԿ-ի կազմակերպություններից և անհապաղ ապահովի մարդասիրական օգնության լիարժեք և անխոչընդոտ մուտք՝ ի շահ տուժած բնակչության»։

Կատրին Կոլոննայի որոշմամբ՝ Ֆրանսիան 7 միլիոն եվրոյի չափով լրացուցիչ ֆինանսական օգնություն կտրամադրի Հայաստանում հկ-ների, ՄԱԿ-ի գործակալությունների և «Կարմիր խաչի» գործունեության համար։

Այս ֆինանսական օգնությունը լրացնում է 2023 թվականի սկզբից «Կարմիր խաչի» միջազգային կոմիտեի միջոցով Ֆրանսիայի կողմից արդեն հատկացված 5,5 միլիոն եվրոն՝ Հայաստանում և Լեռնային Ղարաբաղում փախստականներին և ներքին տեղահանվածներին տրամադրվող աջակցությունը հասցնելով 12,5 միլիոն եվրոյի։

Ֆրանսիայի ԱԳ նախարարության ճգնաժամային և աջակցության կենտրոնը Հայաստան կտեղափոխի 250 ծանր վիրավորներին օգնություն ցուցաբերելու համար բժշկական սարքավորումներ և շտապ օգնության միջոցներ, 40 տուփ ընդհանուր և շտապ օգնության դեղամիջոցներ, մոտ 9000 ստերիլ կոմպրեսներ, և այլն:

Այս օգնությունը Երևանում Ֆրանսիայի դեսպանատան կողմից կտրամադրվի Հայաստանի առողջապահության նախարարությանը։

Ճգնաժամային և աջակցության կենտրոնի թիմը նույնպես կայցելի Հայաստան՝ գնահատելու կարիքները և մարդասիրական օգնությունը հասցնելու առավել խոցելի բնակչությանը: