«Հուսով եմ` Հայաստանն ու Ադրբեջանը կհանդիպեն Բրյուսելում». Բորել

ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը հույս է հայտնել, որ Հայաստանի և Ադրբեջանի իշխանությունները կկարողանան հանդիպել Բրյուսելում և քննարկել տարածաշրջանում հակամարտության հետագա աճը կանխելու հարցերը։

ԵՄ դիվանագիտության ղեկավարը, Գրանադայում Եվրոպական քաղաքական համայնքի (EPC) գագաթնաժողովին ժամանելուն պես, ասել է. «Ափսոս, որ Ադրբեջանն այստեղ չէ, ափսոս, որ Թուրքիան՝ Ադրբեջանին աջակցող գլխավոր երկիրը, նույնպես չկա։ Որովհետև չենք կարող խոսել ավելի լուրջ հարցից, քան այն, որ 100 հազար մարդ ստիպված է եղել լքել սեփական տունը», – ասել է Բորելը:

Նրա խոսքով՝ ԵՄ-ն դատապարտում է «ռազմական գործողությունները՝ հակամարտությունները լուծելու համար»․ «Հուսով եմ, որ Հայաստանի և Ադրբեջանի միջև հանդիպումները կարող են տեղի ունենալ Բրյուսելում, հատկապես, որպեսզի կանխվի հակամարտության հետագա զարգացումը և քաղաքականապես կայունացվի Հայաստանը», – եզրափակել է Բորելը։