Արցախի տեղեկատվական շտաբը հաղորդագրություն է տարածել, որ նախագահ Սամվել Շահրամանյանը պետական ծառայողներին հոկտեմբերի 1-ից աշխատանքից ազատելու մասին հրամանագիր է ստորագրել: Դա չի վերաբերում նախագահին, պետական նախարարին, նախարարներին, Ազգային ժողովի պատգամավորներին, դատավորներին, ԿԸՀ նախագահին եւ մի քանի այլ պաշտոնյաների:
Մամուլում եւ սոցիալական ցանցերում այդ առթիվ քննարկումներ են ծավալվում: Ի պատասխան՝ Արցախի նախագահի շրջապատից հակադարձում են, որ «պետք է ուշադիր կարդալ, խոսքը հասարակական հիմունքներով պաշտոնավարելու մասին է»: Իսկ ո՞վ է Արցախի տեղակատվական շտաբի տարածած տեքստի իսկության երաշխավորը:
Նախագահի հրամանագիրը չի կարող սկսվել «սիրելի հայրենակիցներ» կոչով, որովհետեւ իրավական փաստաթուղթ է եւ կառուցվում ու հրապարակվում է սահմանադրությամբ եւ օրենքով նախատեսված կարգով: Նման փաստաթուղթ հրապարակված չէ: Եւ առհասարակ՝ ի՞նչ խոսք կարող է լինել «հասարակական հիմունքներով» պաշտոնավարող նախագահի, պետական նախարարի, նախարարների, Ազգային ժողովի պատգամավորների եւ դատավորների՝ իշխանության երեք թեւերի ներկայացուցիչների, մասին:
Կամ, ասենք, մինչեւ տարեվերջ ի՞նչ պիտի անի Կենտրոնական ընտրական հանձնաժողովի նախագահը, երբ Լեռնային Ղարաբաղի Հանրապետությունը սեպտեմբերի 28-ին նույն Սամվել Շահրամանյանի, ի դեպ՝ դարձյալ պաշտոնապես չհրապարակված, հրամանագրով լուծարված է, եւ որեւէ ընտրություն, բնականաբար, չի անցկացվելու: Ինչու՞ Ոստիկանության պետը «հասարակական հիմունքներով» կպաշտոնավարի, իսկ ԱԱԾ տնօրենը՝ ոչ: Ի՞նչ հարցեր է կարգավորելու Բնակարանային հարցերով կոմիտեի նախագահը, եթե բոլոր բռնատեղահանված անձինք իրենց տներն ու բնակարանները թողել են Արցախում, իսկ այսօր նրանց կեցության հարցերը հնարավորինս լուծում է Հայաստանի կառավարությունը:
Մինչեւ տարեվերջ պաշտոնավարելու են նաեւ Ստեփանակերտի քաղաքապետը, շրջանային վարչակազմի ղեկավարները, բոլոր համայնքապետերը: Արցախից բռնատեղահանվել է 150 հազար մարդ: Ստույգ վիճակագրություն չկա, թե նրանցից քանի՞սն է հեռացել, իսկ մնացածները որտեղ են ներկայումս բնակվում: Հրապարակվել է սեպտեմբերի 19-ից հետո բռնատեղահանվածների տեղաբաշխումը՝ ըստ մարզերի: Եւ շատ հնարավոր է՝ Արցախի որեւէ համայնքի մի ընտանիք ապաստան է գտել Մեղրիում, մյուսը՝ Նոյեմբերյանում կամ Աշոցքում, իսկ համայնքապետը՝ բնակարան վարձել, ասենք, Էջմիածնում: Այդ եւ մյուս համայնքապետերի մինչեւ տարեվերջ պաշտոնավարման իմաստը ո՞րն է:
Իսկ ո՞րն է այս դիտարկումների իմաստը: Արցախի տեղեկատվական շտաբի տարածած հաղորդագրությանը հաջորդել է լրատվամիջոցներից մեկի հրապարակումը, ըստ որի՝ Սամվել Շահրամանյանը սպասում է Նիկոլ Փաշինյանի հետ հանդիպման, որպեսզի ներկայացնի երկու սկզբունքային հարց: Առաջինը վերաբերում է բոլոր բռնատեղահանվածներին բնակարանային պայմաններով
