ԼՂ-ից բռնի տեղահանված 16 646 աշակերտ արդեն իսկ կրթությունը շարունակում է ՀՀ հանրակրթական դպրոցներում: Այդ մասին Կառավարության ճեպազրույցների ժամանակ ասաց ՀՀ ԿԳՄՍ փոխնախարար Արաքսիա Սվաջյանը:
Նա նաև տեղեկացրեց, որ Երևանում 5303 երեխա է ընդգրկվել հանրակրթական դպրոցներում, իսկ մարզերի մասով ամենաշատը Կոտայքում են. 3045 երեխա դպրոց է հաճախում:
Փոխնախարարն անդրադարձավ նաև դպրոցներում նոր չափորոշիչներին համապատասխան որոշ դասագրքերի բացակայությանը՝ նշելով, որ դրանք այն դասագրքերն են, որոնց հայտարարված մրցույթի ժամանակ չեն ստեղծել դասագրքեր։
«Մենք ունենք որոշ առարկաների գծով դասագրքերի բացակայություն, բայց ես արդեն նշեցի, որ այդ դասագրքերը չեն ստեղծվել:
Իսկ ինչո՞ւ չեն ստեղծվել, որովհետև բաց մրցույթ է հայտարարված եղել: Բոլոր այն հեղինակները կամ հեղինակային խմբերը, որոնք դասագրքեր են ստեղծել, ներկայացրել են դրամաշնորհային մրցույթի, փորձաքննություն են անցել, և եթե համապատասխանել են պահանջներին, ապա դրանք երաշխավորվել են:
Այն դասագրքերը, որոնք չեն ստեղծվել տարվա ընթացքում, կրկին մրցույթը հայտարարվել է»,- պարզաբանեց Սվաջյանը՝ հավելելով, որ խոսքը 2-րդ, 5-րդ, 7-րդ դասարաններին է վերաբերում:
Փոխնախարարը նաև տեղեկացրեց, որ այն առարկաների դասագրքերը, որոնք դեռ նոր չափորոշչով չեն ստեղծվել, այդ դասագրքերի փոխարեն դպրոցներում կիրառվում են հին չափորոշչով դասագրքերը: Նոր չափորոշչի հիման վրա մշակվել են նաև ուսումնական նյութեր, որոնք հին չափորոշչի համադրմամբ մատուցվում են դպրոցներում:
