«Ընդունվեցին մի շարք կարևոր որոշումներ»․ Անահիտ Ավանեսյան

ՀՀ առողջապահության ախարար Անահիտ Ավանեսյանը Ֆեյսբուքի իր էջում գրել է․ 

«Կառավարության այսօրվա նիստում ընդունվեցին մի շարք կարևոր որոշումներ, որոնցից մի քանիսը կուզենայի ընդգծել`

Կբարելավվեն ԱՆ ենթակայությամբ գործող «Քրեակատարողական բժշկության կենտրոնի» շենքային պայմանները: Բժշկական կետերը կվերանորոգվեն, կոմունալ պայմանները կհամապատասխանեցվեն ազատությունից զրկված անձանց պատշաճ բժշկական օգնության տրամադրմանը:

Կֆինանսավորվի Սևան և Բերդ քաղաքներում դատաբժշկական փորձաքննությունների բաժինների նոր մասնաշենքերի կառուցման նախագծանախահաշվային փաստաթղթերի փաթեթի ձեռքբերումը:

Թմրամիջոցների, հոգեմետ դեղանյութերի և դրանց ժամանակակից տեսակների ճշգրիտ հայտնաբերման համար ձեռք կբերվեն լաբորատոր հատուկ սարքավորումներ: 1971 թվականից չվերանորոգված «Ավանի հոգեկան առողջության կենտրոնի», ինչպես նաև «Սևանի հոգեկան առողջության կենտրոնի» կանոնադրական կապիտալը կավելացվի` մասնակի վերանորոգում իրականացնելու համար»։