Կարևորվել է «Հայաստան-Վրաստան» էլեկտրահաղորդման գծի արագ կառուցումը

ՀՀ ՏԿԵ նախարար Գնել Սանոսյանն ընդունել է KfW Գերմանական զարգացման բանկի Արևելյան Եվրոպայի, Կովկասի և Կենտրոնական Ասիայի տնօրեն Վերոնիկա Գարսիա դել Արկոյի գլխավորած պատվիրակությանը։ Հանդիպման ժամանակ անդրադարձ է կատարվել էներգետիկ և ջրային ոլորտում համագործակցության վերաբերյալ հարցերի։

Նախարար Սանոսյանը կարևորել է KfW-ի հետ համագործակցությամբ Հայաստանի համար կենսական նշանակության ենթակառուցվածքների շուտափույթ կառուցման անհրաժեշտությունը։ Մասնավորապես կարևորվել է «Հայաստան–Վրաստան» էլեկտրահաղորդման գծի արագ կառուցումը։ 

«Մենք պետք է լինենք ճկուն և կայացնենք որոշումներ, որոնք վերջապես կհանգեցնեն ծրագրի իրականացմանը։ Մեզ համար կարևոր է, որ այդ ենթակառուցվածքը կառուցվի»,- ընդգծել է նախարարը։

Վերոնիկա Գարսիա դել Արկոն նշել է՝ արդեն իսկ հստակ պատկերացում կա, թե ինչպես շարժվել առաջ։ Հանդիպման ժամանակ կարևորվել է նաև ջրային ոլորտի ծրագրերում էական առաջընթաց ունենալու անհրաժեշտությունը։