ԱՄՆ-ն մարդասիրական դադարի կոչ է անում, Նեթանյահուն ասում է՝ հրադադար չի կարող լինել

Զելենսկին աջակցություն է հայտնել Իսրայելին՝ կոչ անելով, սակայն, մարդասիրական միջանցքներ ստեղծել, գրում է Ամերիկայի Ձայնը։

Չնայած Վաշինգտոնին տակավին չի հաջողվել Գազայում հրադադարի շուրջ փոխհամաձայնության հասնել արաբական երկրների ղեկավարների հետ, սակայն ԱՄՆ-ն շարունակում է կոչ անել Իսրայելին՝ մարդասիրական դադար տալ։

Իսրայելի վարչապետ Բենիամին Նեթանյահուն վերահաստատել է իր դիրքորոշումը՝ քանի դեռ իսրայելցի պատանդները «Համասի» ձեռքին են, անիմաստ է խոսել հրադադարի մասին։

Իրաք՝ չհայտարարված այցելության ժամանակ ԱՄՆ պետքարտուղար Էնթոնի Բլինքենը վերստին է հանդես եկել պետություններին ու տարածաշրջանային դերակատարներին ուղղված նախազգուշացմամբ՝ հեռու մնալ Իսրայել-«Համաս» հակամարտությունից։

ԱՄՆ կառավարությունը «Համասը» ճանաչել է ահաբեկչական խմբավորում։

«Կոչ եմ անում յուրաքանչյուրին, ով կարող է փորձել օգտվել Գազայի հակամարտությունից, կամ սպառնալ մեր (զինվորական) անձնակազմին, մի՛ արեք այդ»,- հայտարարել է Բլինքենը:

Բլիքենի ներկայացմամբ, Պաղեստինի առաջնորդ Մահմուդ Աբասի հետ կիրակի կայացած հանդիպմանը քննարկել է նաև Գազայի հատվածին մարդասիրական օգնություն տրամադրելու Միացյալ Նահանգների հանձնառությունը և իսրայելա-արաբական հակամարտությունը՝ երկու պետությունների գոյության սկզբունքի հիման վրա կարգավորելու հեռանկարը։