ՀՀ-ի դեմ նոր պատերազմի հավանականությունը. ամերիկացի և բրիտանացի դիտորդների կարծիքը

Հայաստանցի, ամերիկացի և բրիտանացի դիտորդները անդրադառնում են, թե որքանով է հավանական հայ-ադրբեջանական նոր պատերազմը, և թե որ երկրից ինչ կարող է ակնկալել Հայաստանը, գրում է Ամերիկայի Ձայնը։

Միացյալ Նահանգների համար շարունակում է առաջնահերթություն մնալ խաղաղությունը Հայաստանի և Ադրբեջանի միջև՝ հայտարարել է պետքարտուղարության մամլո խոսնակի տեղակալ Վեդանտ Պատելը։

Նրա խոսքով, ԱՄՆ-ն տակավին պատրաստ է հյուրընկալել հայ-ադրբեջանական խաղաղության բանակցությունների հաջորդ փուլը։

«Իհարկե»,- կարճ արձագանքել է պաշտոնյան՝ ավելացնելով․ «Ամենից զատ, ինչ կատարվում է աշխարհում և ինչն այստեղ արժանանում է զգալի ուշադրության, այդ երկու երկրների [Հայաստանի ու Ադրբեջանի] միջև խաղաղությունը շարունակում է մեզ համար, պետքարտուղար Բլինքենի համար առաջնահերթություն մնալ, և այդ հարցում [պետքարտուղարությունը] կշարունակի ներգրավված մնալ»։

Վաշինգտոնից, Բրյուսելից հնչող հայտարարությունների ֆոնին իրավիճակին անդրադառնում են վերլուծաբանները։

Չնայած այն ընկալմանը, թե Ադրբեջանի վերջին ձեռքբերումները և Լեռնային Ղարաբաղի անկումն այլևս ի վիճակի են չեզոքացնել հայ-ադրբեջանական հակամարտության հիմքերը և խնդիրը կլուծեին հօգուտ Ադրբեջանի, սակայն իրավիճակի որևէ նոր սրացում, հավանական է, որ լինի Հայաստանի միջազգայնորեն ճանաչված տարածքում՝ կարծիք է հայտնում ԱՄՆ բանակի կրթական հաստատության՝ «War College»-ի եվրասիական հետազոտությունների ամբիոնի դոցենտ, գնդապետ Ռոբերտ Համիլթոնը: