Թոշակառուներն առանց բանկը փոխելու հնարավորություն կունենան օգտվել հետվճարի համակարգից

Թոշակառուները շարունակելու են անկանխիկ ծախսերի դեպքում ստանալ 10% հետվճարը։ Բայց եթե նախկինում այդ 10%-ի 5-ը վճարում էին բանկերը, իսկ մյուս մասը՝ կառավարությունը, հիմա կառավարությունը կվճարի ամբողջ 10%-ը։

Այս մասին այսօր խորհրդարանում ասաց ֆինանսների նախարար Վահե Հովհաննիսյանը՝ պատասխանելով ԱԺ «Քաղաքացիական պայմանագիր» խմբակցության պատգամավոր Բաբկեն Թունյանի հարցին։

Պատգամավորը հարցրեց՝ սա նշանակու՞մ է, որ բոլոր թոշակառուներն, ունենալով ցանկացած բանկային քարտ, կարող են օգտվել հետվճարի հնարավորությունից։

Նախարարը նշեց, որ դա ենթադրում է, որ սոցհարցերի նախարարությունը պետք է համապատասխան պայմանագրեր կնքի մնացած բանկերի հետ․

«Ենթադրում եմ՝ բանկերը այս պայմանագրերը կնքելու պատրաստակամություն կունենան։ Այո, Դուք ճիշտ եք։ Այդ պարագայում բոլոր թոշակառուները հնարավորություն կունենան առանց բանկը փոխելու օգտվել հետվճարի համակարգից»։