Թուրքիայի ԱԳՆ-ն ողջունել է Ադրբեջանի և Հայաստանի համատեղ հայտարարությունը

«Մենք ողջունում ենք Ադրբեջանի նախագահի վարչակազմի և Հայաստանի վարչապետի գրասենյակի որոշումը՝ կոնկրետ քայլեր ձեռնարկել երկու երկրների միջև վստահության հաստատման ուղղությամբ, ինչպես նշված է համատեղ հայտարարության մեջ»։

Այս մասին ասված է Թուրքիայի արտգործնախարարության հայտարարության մեջ։

Նշվում է, որ Անկարան աջակցում է վստահության բարձրացմանն ուղղված լրացուցիչ քայլերի ձեռնարկման հետ կապված քննարկումները շարունակելու որոշմանը։

«Մենք ցանկանում ենք, որպեսզի Ադրբեջանի և Հայաստանի միջև խաղաղ համաձայնագրի ստորագրումը հնարավորինս շուտ լինի, որը կդառնա Հարավային Կովկասում մշտական խաղաղության և կայունության հաստատման կարևորագույն իրադարձություններից մեկը»,- ասվում է Թւրքիայի ԱԳՆ հայտարարության մեջ։

Հիշեցնենք՝ երեկ հրապարակվել էր ՀՀ վարչապետի աշխատակազմի և Ադրբեջանի նախագահի վարչակազմի համատեղ հայտարարությունը գերիների փոխադարձ ազատ արձակման մասին, ավելի ուշ ադրբեջանական լրատվամիջոցները հրապարակել էին ազատ արձակվող հայ զինծառայողների անունները։