«Հայրենասիրություն հասկացությունը դեֆորմացվել է»․ վարչապետ

ՀՀ վարչապետ Նիկոլ Փաշինյանը ևս մի հատված է հրապարակել Գավառում տեղի ունեցած «Քաղաքացիական պայմանագիր» կուսակցության նախաձեռնող խմբի նիստում իր ելույթից և նշել, որ այսօրինակ քննարկումների առանցքում «հայրենիք» և «պետություն» հասկացությունների փոխհարաբերությունների հարցն է:

«Ես հիշում եմ, որ 2021 թվականից հրապարակային այդ թեմայով խոսում եմ և անընդհատ առաջ եմ քաշում հայրենասիրության այն մոդելի հարցը, որը մեր բոլորիս հավաքական մտքի մեջ կա: Ու հարցը շատ պրակտիկ է. 2024 թվականի աշխատանքային առաջին օրերը ես սկսել եմ այս հարցի շուրջ շատ լուրջ և խորը մտածումներով: 

Երբ աշխատանքային առաջին օրն այցելեցի մեր նորակառույց դպրոցները, մարզադահլիճները, այդ այցերի տպավորություններով ավելի ահագնացավ այն խնդիրը, թե հայրենասիրության մոդելը ո՞րն է: Կառավարությունը, կառավարության պատասխանատուները, մենք՝ բոլորս այս հարցով շատ մեծ սթրեսի մեջ ենք։ Որովհետև մենք ասում ենք՝ այս ի՞նչ է տեղի ունենում: Թվում է, թե ինչ հայրենասիրական ծրագիր է, մենք կառուցում ենք դպրոցներ և մարզադահլիճներ, բայց երբ գնում ենք, բախվում ենք իրականությանը, տեսնում ենք, որ իրականությունը մեր պատկերացումներից կտրված է։ Եվ էլի վերադառնում ենք հայրենասիրության մոդելի հարցին»,- ասել է վարչապետը:

Նրա խոսքով՝ հարց է ծագում, այն մարդիկ, որոնք այդ ամբողջ աշխատանքն անում են և միշտ չէ, որ լավ է ստացվում, այդ մարդիկ հայրենասեր չե՞ն: 

«Ես ոչ մի կասկած չունեմ այդ մարդկանց հայրենասիրության մեջ, բայց խնդիրն այն է, որ մեր հավաքական ընկալման մեջ հայրենասիրություն հասկացությունը դեֆորմացվել է: Շատ հաճախ հայրենասիրությունը հասկանում ենք այն, որ ոտքի ենք կանգնում սեղանի շուրջ, կենաց խմում և հետո գնում-անում ենք մեր աշխատանքը և մեզ մոտ հարց չի առաջանում, թե ի՞նչ որակով ենք անում այդ աշխատանքը: Այստեղ է ֆունդամենտալ պրոբլեմը: Շատ դեպքերում մենք էլ չենք նկատում մեր աշխատանքի թերությունը՝ ինձնից սկսած և շինարարով ավարտված, որովհետև շատ բաներ մեզ համար սովորական են: Այսինքն՝ կախիչը կախված է, ի՞նչ կարիք կա այն ստուգելու, կպոկվի՝ կկպցնենք կամ երեխաներ են, թող աթոռին, պատուհանին կամ պահարանի գլխին դնեն։ Այստեղից են մեր բոլոր խնդիրները և այստեղ է մեր բոլոր պրոբլեմների լուծումը»,- ասել է վարչապետը: 

Փաշինյանի խոսքով՝ մենք չպետք է խորշենք ինքներս մեզ հարց տալուց՝ ի՞նչ է հայրենիքը, ի՞նչ է պետությունը, ի՞նչ է հայրենասիրությունը: 

«Մենք ինչի՞ ենք ասում հայրենիքը պետությունն է, որովհետև եթե այդպես չէ՝ ինքը դառնում է ոչ կոնկրետ՝ մեր պատասխանատվության տիրույթից դուրս։ Պետությունն այն է, որի հետ ամեն օր հարաբերվում ենք, որտեղ ապրում ենք։ Ցավոք, մեր իրականության մեջ ավելի շատ տարածված է այն կեցվածքը, որ ես ամեն ինչ գիտեմ, մենք ամեն ինչ գիտենք։ Սա մեզ զերծ է պահում մեր չիմացածի հետ առնչվելու հնարավորությունից։ Ինչքա՞ն ենք ասում, որ մենք հազարամյա ժողովուրդ ենք, և սա ճիշտ է, բայց այս մտքի չարաշահումը մեզ հետ է պահում արձանագրումից, որ թեկուզ լինելով հազարամյա ժողովուրդ, շատ բան չգիտենք կամ մեր իմացած շատ բաներ մոռացության է մատնվել, կորսվել է»,- նշել է Փաշինյանը։