Թենիսի կորտեր կկառուցվեն մեկ այլ վայրում` նախքան քանդման աշխատանքները

«Ինքս դեռ 1996-ից մինչև 2002 թ. «Արարատ» ակումբում պարապել եմ, դա Երևանում իմ ամենասիրելի վայրերից մեկն է, բայց այստեղ հարցը ոչ թե մեր անձնական նախասիրությունների մասին է, այլ հանրային շահի»,- այս մասին այսօր Երևանի գործակարգավարական խորհրդակցության ժամանակ անդրադառնալով Օղակաձև զբոսայգու նորոգման ծրագրին՝ ասաց Երևանի քաղաքապետ Տիգրան Ավինյանը։

Քաղաքապետի խոսքով՝ Երևանի Փոքր կենտրոնում, բացի Օղակաձև այգուց և մի քանի փոքր այգիներից, կանաչ տարածքի այլ հնարավորություններ չկան, հետևապես այստեղ լուծումները շատ պարզ են.

««Արարատ» ակումբին անպայման տրամադրվելու է տարածք, այն շարունակելու է գործել, և մենք դա ապահովելու ենք։ Պետք է ապահովենք, որ այդ ծրագիրը արվի նախքան կորտերի տեղափոխումը, այսինքն՝ պետք է մեկ այլ հարմար տեղում ունենանք ակումբը, նոր հետագայում անցնենք քանդման աշխատանքներին:

Իսկ ինչ վերաբերում է կանաչ տարածքների վերականգնմանը, այս հատվածում էլ պետք է տարատեսակ շենք-շինություններ քանդվեն, որ տարածքը վերադարձվի երևանցիներին, և, քանի որ աղմուկը այստեղ շատ էր, բոլոր տեսակի պսևդոմասնագետներ սկսեցին խոսել այս մասին, անգամ հասան գնահատականի, որ սա կոռուպցիա է»:

Տիգրան Ավինյանն ընդգծեց` որոշ մարդիկ, այսպես ասած, ճանճերի նման հավաքվել էին այս թեմայի շուրջ, որպեսզի փոքրիկ քաղաքական դիվիդենտներ շահեն` «ասեմ` չի ստացվելու»։