«ՀՀ ինքնիշխանությունն ու տարածքային ամբողջականությունը չենք ֆիքսել». վարչապետ

ՀՀ վարչապետ Նիկոլ Փաշինյանն ԱԺ-կառավարություն հարցուպատասխանի ժամանակ անդրադարձել է խաղաղության օրակարգին։

Մեկնաբանելով պատերազմից հետո խաղաղության օրակարգի մասին հայտարարությունները՝ վարչապետն ասել է, թե դրանց նպատակը միայն ՀՀ ինքնիշխանության և տարածքային ամբողջականության հետ է կապված եղել. 

«Մենք անկախության գոյության ողջ ընթացքում մի բան չենք նկատել՝ ՀՀ ինքնիշխանությունն ու տարածքային ամբողջականությունը չենք ֆիքսել ու լղոզել ենք, դուք էլ, մենք էլ, բոլորս էլ․ ինչն էլ ֆունդամենտալ պրոբլեմ է»։

Ըստ նրա՝ անվտանգային ընդհանուր մարտահրավերների մեջ իրենց ռազմավարական ընկալումն է, որ բոլոր դիրքորոշումներն ու ձևակերպումները պետք է հենվեն լեգիտիմության վրա, լինեն բացառիկ լեգիտիմ։

Անդրադառնալով պաշտոնական Բաքվից հնչող հայտարարություններին՝ վարչապետը նշել է. «Ինչ պայմաններով Իրանը տալիս է անցումը, նույն պայմաններով ՀՀ-ն պատրաստ է տալ։ Եթե ՀՀ տարածքով անցումն Ադրբեջանի հիմնական մասից Նախիջևան 47 կմ է, Իրանի տարածքով 49 կմ է։ Եթե հսկողական գործառույթներն ընդունելի են 49 կմ–ի համար, բնականաբար, դրանք չեն կարող ընդունելի չլինել 47 կմ–ի համար»։

Վարչապետը նաև ասել է. «ԼՂ կարգավիճակի որոշումն առանց սահմանափակումների նշանակում է «0 կարգավիճակ», այդ թվում՝ Ադրբեջանի կազմում: Ադրբեջանի կազմում 0 կարգավիճակին հասնելու համար 2018 թ. օգոստոսի դրությամբ բանակցային գործընթացը դասավորված էր նախապատրաստի իրավիճակում: Անհրաժեշտության դեպքում սա կապացուցեմ»։