Գյումրիում հունվարի 21-ին պաշտոնապես դռները բացեց Հայ-ֆրանսիական հոգեբանական և սոցիալական աջակցման կենտրոնը` «Ֆրանսիական Լույս» ասոցիացիայի հովանու ներքո։ 44-օրյա պատերազմից հետո ձևավորված ասոցիացիան տարաբնույթ ծառայություններ է մատուցում՝ բժշկա-հոգեբանականից մինչև անվճար ճաշարան, Արցախից բռնի տեղահանված անձանց համար։
«Մեր առաջին քայլը եղավ Ֆրանսիայից բժշկական սարքավորումներ և դեղորայք ուղարկելը, հաջորդ քայլը բժշկական խումբ Ստեփանակերտ ուղարկելն էր, իսկ դրանից հետո գրեթե ամեն ամիս այցելել ենք Հայաստան։ Մեր հիմնական ուղղվածությունը Արցախն էր։ Սկզբում միտք չունեինք ասոցիացիա ստեղծելու, բայց հետո հասկացանք, որ անելիքներն իրականացնելու համար պետք է ստեղծել։ Պաշտոնապես «ծնվեցինք» 2021 թվականի փետրվարին՝ Ֆրանսիայում, և այսպես մեր գործունեությունը մեզ բերեց հասցրեց Գյումրի»,- ներկայացնելով կենտրոնի անցած ուղին՝ ասել է «Ֆրանսիական լույս» ասոցիացիայի հիմնադիր և նախագահ, բժիշկ Լևոն Խաչատրյանը՝ վստահեցնելով, որ այսուհետևս կլինեն կարիքավորների կողքին։
