«Ադրբեջանն առաջարկել է օգտագործել 1974-1990 թթ. քարտեզները». տեղեկացրել է Հայաստանի ԱԳ նախարար Արարատ Միրզոյանը։ Նրա խոսքով՝ որոշ ուսումնասիրությունից հետո հայկական կողմը ենթադրել է, որ դրանք կարող են կիրառելի լինել, «բայց Ադրբեջանի նախագահի վերջին հարցազրույցում նույնիսկ ադրբեջանական բուն առաջարկից է հետընթաց նկատվում»։
Միրզոյանն ասել է, որ հայկական կողմը մշտապես խոսել է 1974-78 թթ․ քարտեզների մասին. «Հայաստանի համար հետագա սահմանազատման գործընթացում առավելագույն հստակությունը, իրավական առումով հնարավորինս անխոցելի հստակությունն առանցքային է, և այս կոնտեքստում ուզում եմ հիշատակել Ալմա Աթայի հռչակագիրը»։
Միրզոյանը հիշեցրել է, որ 2023 թ. ընթացքում Հայաստանի վարչապետի ու Ադրբեջանի նախագահի միջև եղել է 5 հանդիպում, այդ թվում՝ եռակողմ 4 հանդիպում, հնգակողմ` 1 հանդիպում։ Նախարարի խոսքով՝ խաղաղության պայմանագրում առանձին ձևակերպումների շուրջ հնարավոր է եղել գալ փոխհամաձայնության. «Թեև մի քանի առանցքային հարցերում կան դիրքորոշումների տարբերություններ»։
