Պուտինի այցը Թուրքիա նախապատրաստվում է. Պեսկով

ՌԴ նախագահ Վլադիմիր Պուտինի Թուրքիա այցի ժամկետը կհայտարարվի, երբ երկրների ղեկավարները համաձայնեցնեն դրանք, կողմերի բանակցություններն օրակարգում են։ «Արմենպրես»-ի փոխանցմամբ՝ այս հեռանկարի մասին հայտարարել է ՌԴ նախագահի մամուլի քարտուղար Դմիտրի Պեսկովը։

«Մենք բազմիցս ասել ենք, որ, իրոք, ռուս-թուրքական բարձր մակարդակի շփումներն օրակարգում են, դրանք  պատրաստվում են: Հենց նախագահները վերջնականապես համաձայնեցնեն այցի ժամկետները, մենք անմիջապես ժամանակին կտեղեկացնենք», – Պեսկովի խոսքն է մեջբերել «ՌԻԱ Նովոստի»-ն:

Սպասվում է, որ Պուտինի այցը կկայանա փետրվարի 12-ին, գրել էր Türkiye թերթը հունվարի 20-ին։

Պուտինն ավելի վաղ հայտնել էր, որ ծրագրում է իր թուրք պաշտոնակից Ռեջեփ Թայիփ Էրդողանի հետ հանդիպել  տարեսկզբին․ ղեկավարների հանդիպումը մինչ այդ չստացվեց Թուրքիայի նախագահի ժամանակացույցի պատճառով: