Հայաստանի ԱԳ նախարար Արարատ Միրզոյանը հայտարարել է, թե Հայաստանի համար սկզբունքային չէ՝ Ադրբեջանի հետ բանակցությունները կընթանան միջնորդների՞ ներկայությամբ, թե՞ ուղիղ շփումներով. «Սկզբունքային են բանակցությունների բովանդակությունն ու սկզբունքները, որոնց շուրջ բանակցությունները պետք է տեղի ունենան»։
Ըստ Միրզոյանի՝ խաղաղության պայմանագրի տեքստի շուրջ հանդիպումները ցանկության դեպքում կարելի է անվանել և՛ միջնորդավորված, և՛ ուղիղ. «Տարբեր գործընկերներ են կազմակերպել հանդիպումները, բայց, միևնույն ժամանակ, կարելի է ասել՝ սրանք ուղիղ բանակցություններ էին, որովհետև հանդիպման ժամանակ երկու կողմը միմյանց հետ են բանակցել»։
Ըստ նրա՝ այս մասին խոսակցություններն արհեստական են։
Խոսելով երկրների ղեկավարների հանդիպումների մասին՝ նա շեշտել է, որ կան դրանք կազմակերպելու փորձեր, բայց դեռ որևէ պայմանավորվածություն չկա. «Այս պահին ինչպես երկու երկրների ղեկավարների հանդիպման պայմանավորվածություն չկա, այնպես էլ՝ ԱԳ նախարարների հանդիպման»։
Ըստ Միրզոյանի՝ սահմանին հիմա նույնպես էսկալացիայի հավանականություն կա. «Հռետորաբանությունը, որ ականատես եղանք Ադրբեջանի նախագահի հարցազրույցում, թույլ չի տալիս մեկ վայրկյան անգամ թուլացնել զգոնությունը․ ավելին, նույն հարցազրույցում լսեցինք Հայաստանի ինքնիշխան տարածքի նկատմամբ անթաքույց պահանջներ»։
