Ռուսաստանը պատրաստ է աջակցել Հարավային Կովկասում խաղաղության և կայունության հասնելուն ուղղված ջանքերին, ըստ «Արմենպրես»-ի` ամենշաբաթյա ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Նրա խոսքով՝ Ռուսաստանը մշտապես մեծ ուշադրություն է դարձրել հայ-ադրբեջանական կարգավորման մարդասիրական հարցերին:
Զախարովան նշել է, որ Մոսկվան շարունակում է մնալ Երևանի գործընկերը և վճռական ներդրում է ունեցել ռազմական գործողությունների դադարեցման գործում, մասնավորապես ՝ 2020 թվականի աշնանը, ներկայումս ևս շարունակում է ներդրում ունենալ։
«Ռուսաստանն ակտիվորեն աջակցել է ռազմագերիների, պահվող անձանց փոխանակմանը, անհետ կորածների որոնմանը, ականապատ դաշտերի քարտեզների փոխանցմանը։ Ռուսաստանը պատրաստ է շարունակել այդ ջանքերը, որոնք հանգեցնում են Հարավային Կովկասում խաղաղության և կայունության հաստատմանը», – ասել է Զախարովան։
