Վրաստանի վարչապետի պաշտոնում Ղարիբաշվիլիին կփոխարինի Կոբախիձեն

«Վրացական երազանք-ժողովրդավարական Վրաստան» իշխող կուսակցության ներկայիս նախագահ Իրակլի Կոբախիձեն կուսակցության առաջիկա համագումարում կառաջադրվի վարչապետի պաշտոնում, իսկ Վրաստանի գործող վարչապետ Իրակլի Ղարիբաշվիլին կզբաղեցնի կուսակցության նախագահի պաշտոնը, տեղեկացնում է «Արմենպրես»-ը` վկայակոչելով Sputnik գործակալության վրացական ծառայությունը:

Ըստ այդ հաղորդման` «Իմեդի» հեռուստաալիքը հայտնել է, որ հունվարի 24-ին տեղի է ունեցել «Վրացական երազանք» կուսակցության քաղխորհրդի նիստը։ Նիստում որոշում է ընդունվել կուսակցության համագումար հրավիրել փետրվարի 1-ին, որտեղ էլ կհայտարարվի փոփոխությունների մասին։

Ըստ վերոնշյալ հեռուստաալիքի` Կոբախիձեն նաև կզբաղեցնի «Վրացական երազանք» կուսակցության քաղաքական քարտուղարի պաշտոնը։