Fitch. ՀՀ-ի տնտեսության դիվերսիֆիկացում ՌԴ–ից` առաջիկայում չի սպասվում

Միջազգային վարկանիշային ամենահեղինակավոր կազմակերպություններից մեկը՝ Fitch-ը, վերահաստատել է Հայաստանի՝ արտարժույթով երկարաժամկետ պարտավորությունների թողարկման սուվերեն «BB-» վարկանիշը` կայուն հեռանկարով:

Վարկանիշի պահպանման հիմքում ընկած է երկրի ամուր մակրոտնտեսական և հարկաբյուջետային քաղաքականության շրջանակը՝ երաշխավորված միջազգային վարկատուների ֆինանսների հասանելիությամբ ու Արժույթի միջազգային հիմնադրամի աջակցությամբ:

Վարկանիշային կազմակերպությունը ներկայացրած հոդվածի «Գլոբալ ռիսկեր» ենթաբաժնում նաև խնդիրներ է արձանագրում։ 

Ըստ Fitch-ի՝ Հայաստանի տնտեսությունն առևտրի և էներգետիկայի առումով մեծապես կախված է Ռուսաստանից, և մոտ ապագայում չի կանխատեսվում նշանակալի դիվերսիֆիկացում Ռուսաստանից:

Ընդգծվում է, որ Հայաստանի և Ռուսաստանի հարաբերությունները շարունակում են լարված մնալ Լեռնային Ղարաբաղում խաղաղության պահպանման պարտավորությունների ենթադրյալ չկատարումից հետո, և Հայաստանը շարունակում է իր բանկային հատվածում ռուսական կազմակերպությունների դեմ կիրառել արևմտյան պատժամիջոցներ: Այնուամենայնիվ, 2021 թվականից ի վեր ապրանքների արտահանումը Ռուսաստան աճել է գրեթե 300 %-ով, իսկ Ռուսաստանին բաժին է ընկել արտահանման 51 %-ը և ներմուծման 30 %-ը 2023 թ. 1-ինից մինչև 3-րդ եռամսյակներում։

Fitch-ն առանձնացրել է նաև Հայաստանի և Ադրբեջանի միջև աշխարհաքաղաքական ռիսկերի պահպանումը՝ նշելով, որ երկրների միջև մնում է մի քանի վիճելի հարց, այդ թվում՝ Ադրբեջանի և նրա էքսկլավ Նախիջևանի միջև ցամաքային հաղորդակցության կառուցումը, որն անցնելու էր Հայաստանի տարածքով, նաև` որոշ շրջաններում սահմանազատման հարցերը։