Իրանի Իսլամական հանրապետությունում Մեծ Բրիտանիայի դեսպան Սայմոն Շիրքլիֆը կանչվել է Իրանի ԱԳՆ՝ վարչապետ Ռիշի Սունակի հայտարարություններից հետո, որոնք Թեհրանը համարում է հակաիրանական, և այդ կապակցությամբ իր բողոքն է արտահայտել՝ համապատասխան նոտա ներկայացնելով Մեծ Բրիտանիայի դեսպանին, տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։
«Իրանի Իսլամական Հանրապետության դեմ բրիտանական ռեժիմի շարունակվող մեղադրանքների պատճառով Թեհրանում Մեծ Բրիտանիայի դեսպան Սայմոն Շիրքլիֆին Արևմտյան Եվրոպայի վարչության գլխավոր տնօրենն այսօր հրավիրել է Արտաքին գործերի նախարարություն և դեսպանին փոխանցել բողոքի նոտան», – ասված է հաղորդագրության մեջ:
Նախօրեին Սունակը մտահոգություն էր հայտնել Մերձավոր Արևելքում լարվածության վերաբերյալ և կոչ արել Իրանին թուլացնել էսկալացիան Սիրիայի և Հորդանանի սահմանին գտնվող ամերիկյան ռազմակայանի վրա անօդաչու թռչող սարքի հարվածից հետո, որի պատասխանատվությունը ստանձնել էր «Իրաքի իսլամական դիմադրություն» շիա շարժումը:
