Լեռնային Ղարաբաղից բռնի տեղահանված անձանց բնակվարձի և կոմունալ վճարների համար նախատեսված 40+10 հազարական դրամի չափով աջակցության հունվար ամսվա վճարումները կիրականացվեն առաջիկա երկու-երեք աշխատանքային օրերի ընթացքում, փետրվարի 2-ին «Հումանիտար կենտրոն»-ում կայացած ասուլիսի ընթացքում տեղեկացրել է ՀՀ աշխատանքի և սոցիալական հարցերի նախարարի մամուլի քարտուղար Զարուհի Մանուչարյանը։

«Նախատեսված է հունվար ամսվա վճարումներն ամբողջացնել մինչև փետրվարի 7-ը»,-ասել է Մանուչարյանը։

Նա հայտնել է, որ ԼՂ-ից բռնի տեղահանված անձանց կենսաթոշակների վճարումներն այսուհետ նախատեսված է իրականացնել հստակ պարբերականությամբ` մինչև տվյալ ամսվա 6-րդ աշխատանքային օրը։

«Փետրվար ամսվա դեպքում կենսաթոշակները կվճարվեն մինչև փետրվարի 8-ը»,- հավելել է նա։