Ռուսաստանի դեմ մշակվում է պատժամիջոցների 13-րդ փաթեթը, որը կարող է ներառել ավելի քան 200 ֆիզիկական անձանց և ընկերություններ, տեղեկացրել են «ՌԻԱ Նովոստի» գործակալությունից։
Ըստ գործակալության` նախապատրաստվող փաթեթի մասին DPA գործակալությանը տեղեկություններ են տրամադրել եվրոպացի պաշտոնյաները։
Սպասվում է նշված անձանց ակտիվների սառեցում ԵՄ-ի տարածքում: Նաև պաշտոնյաներն իրավական բազա են պատրաստում ՌԴ-ի ավելի վաղ սառեցված ակտիվներից ստացված շահույթներն Ուկրաինային փոխանցելու համար:
Պատժամիջոցների կենթարկվեն նաև այն օտարերկրյա ընկերությունները, որոնք վերավաճառքի միջոցով «նպաստում են Ռուսաստանի ռազմական ու տեխնոլոգիական ամրապնդմանը կամ նրա պաշտպանության ու անվտանգության հատվածի զարգացմանը։ Այս դեպքում նոր արգելքները ԵՄ ընկերություններին թույլ չեն տա կրկնակի նշանակության ապրանքներ և տեխնոլոգիաներ վաճառել նրանց։
Bloomberg գործակալությունն էլ հաղորդել է, որ Ռուսաստանի դեմ սեփական պատժամիջոցներն են պատրաստում նաև G7-ի անդամ երկրները:
