Ըստ ԱՀԿ-ի` Աֆրիկայում խոլերայի լուրջ բռնկում կա

Միայն այս տարվա հունվարին աֆրիկյան 10 երկրներում գրանցվել է խոլերայի 26 հազար դեպք և մահվան 700 դեպք. վտանգը շատ մեծ է, որ այս հիվանդությունն այլ երկրներում ևս կտարածվի, Ժնևում կայացած ճեպազրույցում հայտարարել է Առողջապահության համաշխարհային կազմակերպության (ԱՀԿ) աֆրիկյան բյուրոյի ներկայացուցիչ Ֆիոնա Բրական։

«Այս տարվա առաջին չորս շաբաթվա ընթացքում ԱՀԿ-ի Աֆրիկայի տարածաշրջանի 10 երկրներ հաղորդել են հիվանդության ավելի քան 26 հազար դեպքի և մահվան 700 դեպքի մասին, ինչը գրեթե կրկնակի գերազանցում է 2023 թվականի այդ նույն ժամանակահատվածում գրանցված դեպքերի թիվը», – ԱՀԿ-ի ներկայացուցչի խոսքն է մեջբերել «ՌԻԱ Նովոստի» գործակալությունը:

Ներկայում բռնկումներ կան Զամբիայում, Զիմբաբվեում, Մոզամբիկում, Տանզանիայում, Կոնգոյի Դեմոկրատական ​​Հանրապետությունում, Եթովպիայում և Նիգերիայում, մանրամասնել է Բրական։