Դարչիաշվիլին հավաստիացրել է, որ Վրաստանը պատրաստ է իր հարևանների համար բանակցությունների հարթակ լինել

Վրաստանի արտաքին գործերի նախարարի թեկնածու Իլիա Դարչիաշվիլին խորհրդարանի ամբիոնից հայտարարել է, որ Թբիլիսին ցանկանում է և պատրաստ է հարթակ լինել Հայաստանի և Ադրբեջանի միջև բանակցությունների համար, հաղորդել է Sputnik գործակալության վրացական ծառայությունը։

«Տարածաշրջանում խաղաղության և կայունության խթանման առումով Վրաստանը կարևոր քայլ է կատարել «Խաղաղ հարևանություն» նախաձեռնության մեկնարկով։ Մենք պատրաստ ենք շարունակել մեր մասնակցությունն այս ուղղությամբ՝ մեր հարևան երկրների կարիքներին համապատասխան։ Մենք ուզում ենք, որ Թբիլիսին մեր հարևանների համար ապագայում դառնա մի վայր, որտեղ նրանք կարողանան քննարկել երկրների միջև վստահության ձևավորմանը նպաստող արդիական թեմաներ»,- ասել է Դարչիաշվիլին։

Նախարարի թեկնածուն նաև նշել է, որ Վրաստանի կառավարությունը նոր վարչապետ Իրակլի Կոբախիձեի ղեկավարությամբ ևս մտադիր է շարունակել աշխատանքը համաշխարհային հարթակում Հարավային Կովկասի դերի բարձրացման ուղղությամբ։