Փարիզի Օրսե թանգարանը պատմական ռեկորդ է գրանցել Վան Գոգի «շնորհիվ»

Հոլանդացի նկարիչ Վինսենթ վան Գոգի (1853−1890թթ.) աշխատանքների ցուցահանդեսի այցելուների թիվն առնվազն 793 հազար է։ Այս պատմական ռեկորդը սահմանվել է Փարիզի Օրսե կերպարվեստի թանգարանում (Musée d’Orsay)՝ 1986 թվականի բացումից ի վեր։

Հոկտեմբերի 3-ին ցուցահանդեսի բացումից հետո թանգարանն օրական ընդունել է միջինը 7181 այցելու։ Ցուցահանդեսում ներկայացված են Վան Գոգի աշխատանքները, որոնք նկարվել են Փարիզի մերձակայքում գտնվող փոքրիկ քաղաքում՝ մինչև նկարչի ինքնասպանությունը։

Հայտնի է, որ Վան Գոգն ինքնասպանությունից առաջ 70 օրվա ընթացքում ստեղծել է 74 կտավ, այդ թվում՝ «Բժիշկ Գաշեի դիմանկարը» (Le Docteur Paul Gachet), «Եկեղեցին Օվերում» (L’Église d’Auvers-sur-Oise) և «Ագռավներով ցորենի արտը» (Champ de blé aux Corbeaux):