11 մլրդ դոլար` սպառազինության արդիականացմանն ու համալրմանը

Հնդկաստանի նախարարների կաբինետի Անվտանգության հարցերով կոմիտեն հավանություն է տվել  ավելի քան 11 միլիարդ դոլար գումարի չափով մի քանի գործարքների՝ ուղղված երկրի զինված ուժերի սպառազինության արդիականացմանն ու համալրմանը, ըստ «Արմենպրես»-ի հաղորդել է ՏԱՍՍ-ը` վկայակոչելով The Economic Times թերթը:

Ըստ աղբյուրի՝ այդ գործարքների թվում է, մասնավորապես, BrahMos Aerospace-ի հետ կնքված պայմանագիրը ռազմածովային ուժերին ավելի քան 200 մեծ հեռահարության գերձայնային թևավոր հրթիռների մատակարարման համար։

Ի թիվս այլ գնումների, նշվում է 7,2 միլիարդ դոլար արժողությամբ խոշոր պայմանագիր՝ Су-30МКИ կործանիչները նոր ռադարներով, էլեկտրոնային պատերազմի և թռիչքների կառավարման համակարգերով և զենքերով զինելու համար: Պարբերականի տվյալներով՝ դրանք կփոխարինվեն ավելի ժամանակակից հնդկական տարբերակներով։

Գրեթե 640 մլն դոլար կհատկացվի ՄիԳ-29 կործանիչների շարժիչների փոխարինմանը։ Շվեդիայից ռադարների և զենիթային L70 հրանոթների գնման համար հատկացվել է մոտ 760 մլն դոլար։ Եվս 850 մլն դոլար է հաստատվել Հնդկաստանի փոքր հեռահարության սպառազինության համակարգի մշակման համար։