Ռուսաստանի Դաշնության և Թուրքիայի ղեկավարներ Վլադիմիր Պուտինի և Ռեջեփ Թայիփ Էրդողանի հանդիպումը չի կայանա Ռուսաստանում նախագահական ընտրություններից առաջ, սակայն ամենաբարձր մակարդակով շփումների նախապատրաստման աշխատանքներն ընթանում են, ըստ «Արմենպրես»-ի` «Ինտերֆաքս» գործակալությունը հայտնել է, որ այդ մասին հայտարարել է ՌԴ նախագահի մամուլի քարտուղար Դմիտրի Պեսկովը:
«Ընտրություններից առաջ՝ ոչ», – լրագրողներին ասել է նա։
Կրեմլի ներկայացուցչի խոսքով՝ «մինչև ընտրությունները նախագահը բավականին հագեցած և լարված գրաֆիկ ունի, դե` պարոն Էրդողանի գրաֆիկը նույնպես շատ լարված է»։
«Բայց բարձր մակարդակով շփումների նախապատրաստման աշխատանքները տարվում են, մենք քանիցս հայտարարել ենք դրա մասին», – հավելել է նա։
Պեսկովը պարզաբանել է, որ «այդ շփումները տեղի կունենան այն պահին, երբ դա լավագույնս կհամապատասխանի երկու նախագահների գրաֆիկներին»։
Ռուսաստանում նախագահական ընտրությունները կանցկացվեն մարտի 15-17-ը։
