Հայաստանի պաշտպանության նախարար Սուրեն Պապիկյանը Հունաստանի պաշտպանության նախարար Նիկոլաոս Դենդիասի հետ ասուլիսի ժամանակ հայտարարել է, որ Հայաստանի և Հունաստանի միջև հարաբերություններում իր ուրույն տեղն ունի պաշտպանության ոլորտի համագործակցությունը։
Ըստ Պապիկյանի՝ դա իրականացվում է փոխադարձ հետաքրքրություն ներկայացնող ուղղություններով, որոնց մի մասն ավանդական բնույթ են կրում և իրականացվում են Հայաստանի անկախացումից հետո երկու երկրների միջև ձևավորված պաշտպանության բնագավառում համագործակցության հենց սկզբից, իսկ մյուս մասը` պայմանավորվածությունների արդյունքում ձևավորված նոր ոլորտներում։
«Հանդիպման ընթացքում քննարկել ենք ռազմատեխնիկական համագործակցությանն առնչվող հարցեր, մասնավորապես` կարևորել ենք 2023 թվականի դեկտեմբերին Հունաստան կատարած իմ այցի ընթացքում Հայաստանի և Հունաստանի միջև ռազմատեխնիկական համագործակցության մասին համաձայնագրի ստորագրումից հետո նոր շունչ հաղորդելը։ Քննարկել ենք Հայաստան-Կիպրոս-Հունաստան եռակողմ ձևաչափով համագործակցությունը։ Անդրադարձել ենք նույն արժեքները կրող այլ բարեկամ երկրների հետ բազմակողմ ձևաչափով համագործակցության հնարավորություններին։ Կարևորել ենք ՆԱՏՕ-ի և ԵՄ-ի շրջանակներում Հայաստանի և Հունաստանի միջև համագործակցությունը»։
