Ադրբեջանական լրատվամիջոցները հայտնել են, որ այսօր ադրբեջանական կողմին է հանձնվել Հայաստանի սահմանը հատած ադրբեջանցի զինծառայող Ռուսլան Փենախովը։
Երեկ ՀՀ քննչական կոմիտեն հաղորդել է, որ Ադրբեջանի ԶՈՒ զինծառայողի նկատմամբ հանրային քրեական հետապնդումը դադարեցվել է։
Ըստ ՔԿ-ի` փաստական տվյալներ են ձեռք բերվել այն մասին, որ ՀՀ պետական սահմանը հատած Ադրբեջանի զինված ուժերի զինծառայող Ռուսլան Էլդանիս-Օղլու Փենախովը 2024 թ. փետրվարի 28-ին ՀՀ ԶՈՒ դիրքերի մոտակայքում հայտնվել է ադրբեջանական դիրքում զինծառայողների միջև տեղի ունեցած միջադեպից հետո՝ փախուստի դիմելու և մոլորվելու հետևանքով:
ՀՀ ազգային անվտանգության ծառայությունը փետրվարի 28-ին հայտնել է, որ Սյունիքի մարզի Տեղ համայնքի սահմանային հատվածում հայ-ադրբեջանական շփման գիծը հատել է ադրբեջանական զինված ուժերի զինծառայող, որը զինված է եղել ԱԿՄ տիպի ինքնաձիգով ու 1 պահատուփով:
