Եվրամիությունը կառաջարկի Ռուսաստանի դեմ նոր պատժամիջոցներ սահմանել ռուս ընդդիմադիր գործիչ Ալեքսեյ Նավալնիի մահվան պատճառով, «Արմենպրես»-ի փոխանցմամբ՝ հաղորդել է Bloomberg գործակալությունը՝ վկայակոչելով իր տրամադրության տակ հայտնված փաստաթղթի նախագիծը։
Ըստ հրապարակման՝ ԵՄ-ն առաջարկում է պատժամիջոցների ցանկում ներառել ռուսաստանցի պետական պաշտոնյաների, դատավորների և բանտի ղեկավար աշխատակիցների. նրանց անունները դեռ չեն նշվում:
Ընդդիմադիր գործիչը քրեակատարողական հիմնարկում մահացել էր փետրվարի 16-ին։ Նրա մահվան հստակ պատճառները դեռ չեն հաղորդվել։ Նավալնիի ընտանիքը և արևմտյան քաղաքական գործիչները նրա մահվան համար մեղադրել են ՌԴ իշխանություններին և անձամբ նախագահ Վլադիմիր Պուտինին։
ՌԴ նախագահի մամուլի քարտուղար Դմիտրի Պեսկովը հայտարարել է, որ արևմտյան քաղաքական գործիչների հայտարարությունները Նավալնիի մահվան մասին Մոսկվան համարում է անզուսպ և անթույլատրելի. դեռևս չկա բժիշկների և դատաբժշկական փորձագետների վերջնական եզրակացությունը։
ՌԴ արտգործնախարար Սերգեյ Լավրովն ասել է, որ Արևմուտքն իրավունք չունի Ռուսաստանի ներքին գործերին միջամտելու Նավալնիի մահվան առնչությամբ։
