Իսպանացի պատգամավոր Ջոն Ինյարիտուն կարծում է, որ միջազգային հանրությունը պետք է նպատակաուղղված պատժամիջոցներ կամ այլ պատիժներ սահմանի այն անձանց կամ կազմակերպությունների նկատմամբ, որոնք պատասխանատու են Լեռնային Ղարաբաղի հայկական պատմամշակութային ժառանգության ոչնչացման և ապագա խախտումները կանխելու համար։
«Ըստ երևույթին, սա այն գիծն է, որն առաջարկում է Եվրախորհրդարանը։ Այդուհանդերձ, ես այդքան էլ լավատես չեմ այս հարցում՝ հաշվի առնելով, որ Ալիևի ռեժիմը 2020-2023 թվականներին կազմակերպել է ԼՂ-ի ամբողջ բնակչության էթնիկ զտում, բայց պատժամիջոցներ չեն կիրառվել»,- «Արմենպրես»-ի թղթակցի հարցին ի պատասխան՝ ափսոսանք է հայտնել իսպանացի պատգամավորը:
Անդրադառնալով միջազգային հանրությունից ակնկալվող հստակ քայլերին՝ պատգամավորը շեշտել է, որ Ադրբեջանի կողմից իրականացվող խախտումներին և վանդալիզմին վերջ դնելը պահանջում է բազմակողմանի մոտեցում՝ ներգրավելով ինչպես դիվանագիտական ու իրավական, այնպես էլ մշակութային ջանքեր:
«Թեև միջազգային հանրությունը դիվանագիտական երկխոսության մեջ է Ադրբեջանի և Հայաստանի հետ՝ ձգտելով հասնել վերջնական խաղաղության, այդուհանդերձ, հենց Լեռնային Ղարաբաղում առանց իրավիճակը վերահսկող անկախ միջազգային մոնիտորինգի մեխանիզմների անհնար կլինի պաշտպանել տեղի հայկական ժառանգությունը»,- ընդգծել է պատգամավորը։
Ջոն Ինյարիտուի կարծիքով՝ հայկական կողմը ևս անելիքներ ունի և անհրաժեշտ է, որ օգտագործի բոլոր օրինական միջազգային հարթակներն ու ինստիտուտները, ինչպիսիք են` ՅՈՒՆԵՍԿՕ-ն և Արդարադատության միջազգային դատարանը, որոնք պետք է պատասխանատվության ենթարկեն Ադրբեջանին մշակութային այս նոր ոչնչացման համար։
«Քաղաքացիական հասարակությունը պետք է խրախուսի մշակութային կրթության և իրազեկման ծրագրերը ինչպես Հայաստանում, այնպես էլ միջազգային մակարդակով: Լրատվամիջոցների, հանրային իրազեկման քարոզարշավների միջոցով պետք է բարձրացնել Լեռնային Ղարաբաղում հայկական մշակութային ժառանգության պահպանման կարևորության մասին իրազեկվածությունը»,- հավելել է պատգամավորը։
