ՆԱՏՕ-ն չի նախատեսում Շվեդիայի հաշվին ընդլայնել դաշինքի այն անդամների թիվը, որտեղ միջուկային զենք է տեղակայված, «Արմենպրես»-ի փոխանցմամբ՝ հայտարարել է ՆԱՏՕ-ի գլխավոր քարտուղար Յենս Ստոլտենբերգը Շվեդիայի վարչապետի հետ համատեղ մամուլի ասուլիսում։
«Մենք նաև մշտապես գնահատում ենք մեր հնարավորությունները, և ներկայում մտադիր չենք Շվեդիայում նոր մարտական խմբեր տեղակայել», – հավելել է նա:
Ըստ Ստոլտենբերգի, եթե մի օր նման անհրաժեշտություն ծագի, ապա նման որոշում պետք է Շվեդիան կայացնի։
«Շվեդիան անկախ երկիր է, և ինքն է որոշումներ կայացնում։ ՆԱՏՕ-ին անդամակցությունը ոչ մի կերպ չի փոխի Շվեդիայի իրավունքը և ունակությունը՝ ասելու «ոչ» միջուկային զենքի տեղակայմանը», – ասել է ՆԱՏՕ-ի ղեկավարը։
Շվեդիան մարտի 7-ին պաշտոնապես դարձավ ՆԱՏՕ-ի 32-րդ անդամը։ Շվեդիայի դրոշի բարձրացման արարողությունը ՆԱՏՕ-ի կենտրոնակայանում տեղի է ունեցել մարտի 11-ին։
