Ի պատասխան ճեպազրույցում հնչած հարցի` Հարավային Կովկասում Ֆրանսիայի ակտիվության ու ՌԴ արձագանքի առնչությամբ, ՌԴ ԱԳՆ պաշտոնական ներկայացուցիչ Մարիա Զախարովան պատասխանել է.
«Տպավորություն է ստեղծվում, որ Երևանում Ֆրանսիայի կողմը շրջվելով ու ռազմա-տեխնիկական համագործակցությունը խորացնելով՝ չեն գիտակցում ոչ իրենց նոր հովանավորների իրական նպատակները, ոչ էլ տարածաշրջանային ռիսկերը։ Միամտություն է կարծել, որ Ֆրանսիան պատրաստ է կամ ունակ է ապահովել Հայաստանի անվտանգությունը։
Եթե այդպիսի հնարավորություն լիներ, Ֆրանսիան կկատարեր իր պարտավորությունները Աֆրիկայի իր դաշնակիցների ու գործընկերների նկատմամբ։ Ֆրանսիան ուղղակի նրանց լքեց ամենաճգնաժամային իրավիճակում։ Չարժի մոռանալ՝ ինչպիսի ձախողմամբ են ավարտվել Ֆրանսիայի միջնորդական կամ խաղաղապահական գործողությունները։
Չգիտեմ, թե Հայաստանի ղեկավարությունը ժողովրդին պատմո՞ւմ է, թե ինչով է հայտնի դարձել Ֆրանսիան, երբ իր վրա այդպիսի գործառույթներ է վերցրել։ Ֆրանսիայի իշխանությունները ղեկավարվում են ոչ թե Հայաստանի շահերով, այլ սեփական ամբիցիաներով, իսկ Հայաստանի կամ Հարավային Կովկասի ապագան նրանց համար փոխանակման տարադրամ է։ Ֆրանսիայի ներկայությունը տարածաշրջանում փորձ է՝ տեղեկատվություն հավաքել, հետևել երկրներին և թույլ չտալ երկրների միջև խաղաղության համաձայնագրերի կայացմանը»։
