Գազայի հատվածում ավելի քան 13 հազար երեխա է զոհվել հոկտեմբերի 7-ից պաղեստինյան անկլավում ընթացող ռազմական գործողությունների հետևանքով, «Արմենպրես»-ի փոխանցմամբ՝ CBS հեռուստաընկերությանը տված հարցազրույցում հայտնել է ՄԱԿ-ի մանկական հիմնադրամի (ՅՈՒՆԻՍԵՖ) գործադիր տնօրեն Քեթրին Ռասելը։
«Մինչ այժմ զոհվել է ավելի քան 13 հազար երեխա, որն ահռելի մեծ, սարսափեցնող թիվ է», – ասել է Ռասելը:
Ռասելը հավելել է, որ ևս հազարավոր երեխաներ վիրավորվել են կամ գտնվում են ավերված շենքերի փլատակների տակ, հազարավոր երեխաներ որբացել են։
Նրա դիտարկմամբ` աշխարհում գրեթե ոչ մի հակամարտությունում երեխաների շրջանում զոհերի այդքան մեծ թիվ չի գրանցվել։
Գազայի հատվածում պատերազմը սկսվել է 2023 թ․ հոկտեմբերի 7-ին՝ այն բանից հետո, երբ պաղեստինյան ՀԱՄԱՍ արմատական շարժման զինյալները ներխուժեցին Իսրայել՝ սպանելով 1200 մարդու, գերեվարելով 253-ին։ Իսրայելն այդ հարձակումից հետո ռազմական գործողություններ է սկսել անկլավում, որի հետևանքով զոհերի թիվն, ըստ տեղի իշխանությունների, գերազանցել է 31 հազար 600-ը, ավելի քան 73 հազար 600 մարդ վիրավորվել է:
