Երգչուհի Սիրուշոն, որ ամուսնությունից հետո սկսեց ոչ այնքան հաճախ ներկայանալ հանդիսատեսին, նույնիսկ իր տևական «լռությամբ» չմոռացվեց բազմահազար երկրպագուների կողմից, իսկ նրա «ուշ-ուշ, բայց ոչ ուշացած» երգերն իսկական բում առաջացրեցին հայկական շոու-բիզնեսում։
Երաժշտական ճաշակ, ոճ և նորաձևություն թելադրող գեղեցկուհին կարծես ինքն էլ գիտակցեց, որ հանդիսատեսն իսկապես որակյալ երաժշտության կարիք ունի, ուստի չթողեց բեմը, ինչպեսև խոսվում էր կուլիսներում։
2017թ-ին իր «Զարթոնքով» կարծես ազդարարելով նաև իր երաժշտական զարթոնքը՝ երգչուհին կրկին հայտնվեց բոլորի ուշադրության կենտրոնում՝ ստվերելով մերօրյա «աստղաբույլը»։ Ընդհանուր առմամբ, վերջին 2-3 տարվա ընթացքում, որպես երգչուհի, Սիրուշոն ավելի ակտիվ գործունեություն է ծավալել, քան դրան նախորդած ամուսնական 7 տարիներին։
2009թ․ հունիսի 6-ին երգչուհին ամուսնացավ ՀՀ երկրորդ նախագահ Ռոբերտ Քոչարյանի կրտսեր որդու՝ Լևոն Քոչարյանի հետ։ Այս միությունը դժվար է դասել «ամուսնություն ըստ հաշվենկատության» ամուսնությունների շարքին, քանզի նրանք վաղուց, ինչպես ենթադրվում է նրանց սոցիալական կայքէջերից, շատ գեղեցիկ սիրավեպ են ունեցել։ Որքան էլ Սիրուշոյի սկեսրայրի կերպարը հանրության մեջ եղել և մնում է վիճելի, այս միությունը ամենևին, հանդիսատեսի աչքերում չխամրեցրեց Սիրուշոյի փայլը։ Գրեթե ոչ մի բացասական արձագանք և նախատինք, ոչ մի ավելորդ մեկնաբանություն։
Հայաստանում հեղափոխությունից հետո նոր թափով վերսկսվեց Մարտի 1-ի քրեական գործը, որը կարծես թարմացրեց մարդկանց հիշողությունները և սոցցանցերում սկսվեց նեգատիվ մեկնաբանությունների տարափ։ Արդեն հեղափոխությունից հետո՝ Առաջին հանրապետության 100-ամյակին նվիրված միջոցառմանը Սիրուշոն ելույթ ունեցավ Հանրապետության հրապարակում։ Ի դեպ, այս այս տոնական համերգին Սիրուշոյի մասնակցությունը ի ցույց էր դնում մի կարևոր հանգամանք՝ ներկա իշխանությունները զերծ են պալատական փոքրոգի ինտրիգներից։
Հատկանշական է, որ Ռոբերտ Քոչարյանի մասնակցությամբ դատական գործընթացների մասին երգչուհին գրեթե քաղաքական մեկնաբանություններ չի հնչեցրել՝ բացառությամբ ֆեյսբուքյան 1-2 գրառման։ Սակայն վերջին օրերին նա թե՛ սոցկայքերում, թե՛ հարցազրույցներում պարբերաբար հնչեցնում է այն միտքը, որ իրեն փորձում են խանգարել։
Ամենևին կասկածի տակ չդնելով այն փաստը, որ հասարակության մի փոքր հատվածի՝ բարոյականության սահմաններից դուրս մեկնաբանությունները կարող են ընկճել երգչուհուն և խեղել նրա բնականոն ստեղծագործական կյանքը, այնուամենայնիվ նրա մեկնաբանություններից ենթադրում ենք, որ նրան խանգարում են ոչ միայն բարոյապես (չնայած սրա մասին նույնպես չի խոսվել), այլև․․․
Սիրելի՛ Սիրուշո, ով կամ ովքե՞ր, և ինչպե՞ս են խանգարում քեզ։
Հ․Գ
- Հայաստանում առավել քան երբևէ ազատ է մեդիա դաշտը, իսկ մեդիաընկերությունների մեծ մասը պատկանում է քոչարյանամերձ շրջանակներին,
- Ֆինանսական խնդիրներ կարծես թե չունեն,
- Համացանցը վերահսկել հնարավոր չէ, և ուրեմն ի՞նչը կամ ո՞վ է խանգարում Հայաստանի թիվ 1 երգչուհուն․․․
