Մեծ Բրիտանիան աջակցում է այն հարթակին, որի արդյունավետ աշխատանքի և կայացման գործում միջնորդական առաքելությամբ հանդես են գալիս ԱՄՆ-ն ու Եվրամիությունը, ինչպես նաև զորակցում է հայկական և ադրբեջանական կողմերին, որպեսզի նրանք ներգրավվեն կառուցողական բանակցություններում՝ հավատալով, որ խաղաղության պայմանագրի ստորագրումը հնարավոր է մոտ ապագայում, «Արմենպրես»-ի հետ զրույցում նման կարծիք է հայտնել ՀՀ-ում Մեծ Բրիտանիայի արտակարգ և լիազոր դեսպան Ջոն Գալագերը։
«Այն փաստը, որ այսօր Հայաստանի և Ադրբեջանի ներկայացուցիչները բանակցում և քննարկում են անչափ կարևոր խնդիրներ, իհարկե, հուսադրող է։ Անցյալ ամիս Բեռլինում հանդիպեցին երկու երկրների արտգործնախարարները, ինչը դրական քայլ է և բացում է հնարավորությունների պատուհան խաղաղ գործընթացն առաջ մղելու համար։ Մեծ Բրիտանիան խրախուսում է երկու կողմերի անմիջական հանդիպումները և կոչ է անում, որպեսզի դրանք կազմակերպվեն ավելի հաճախակի՝ վստահ լինելով, որ կառուցողական մթնոլորտի առկայության պարագայում հնարավոր է քննարկել ամենացավոտ հարցերը»,- ասել է Մեծ Բրիտանիայի դեսպանը։
Անդրադառնալով նաև հայ-թուրքական հարաբերությունների կարգավորման գործընթացին՝ Գալագերն ասել է, որ այդ հարցում Մեծ Բրիտանիան նույնպես աջակցում է կողմերին։
