Գազայի հատվածի կենտրոնում Իսրայելի ավիահարվածի հետևանքով զոհվել են «Համաշխարհային կենտրոնական խոհանոց» (WCK – World Central Kitchen) հասարակական կազմակերպության 7 աշխատակիցներ, «Արմենպրես»-ի փոխանցմամբ՝ հաղորդել է Reuters գործակալությունը։
Զոհերի շարքում են Ավստրալիայի, Բրիտանիայի, Լեհաստանի քաղաքացիներ, ԱՄՆ-ի և Կանադայի երկքաղաքացիություն ունեցող աշխատակից և պաղեստինցիներ։ Նրանք եղել են զրահապատ մեքենաներում, որոնց վրա պատկերված է եղել WCK-ի տարբերանշանը։
Ըստ հրապարակման՝ չնայած Իսրայելի պաշտպանության բանակի հետ համակարգմանը, ավտոշարասյանը հարվածել են պահեստից դուրս գալուց հետո, որտեղ նրանք բեռնաթափել են ծովային ճանապարհով Գազայի հատված մատակարարված ավելի քան 100 տոննա մարդասիրական օգնություն։
Իսրայելը հայտարարել է, որ հանգամանալից ուսումնասիրություն է կատարում ամենաբարձր մակարդակով՝ պարզելու, իրենց բնութագրմամբ, այդ «ողբերգական միջադեպի» հանգամանքները։
ՄԱԿ-ը և այլ միջազգային կազմակերպություններ Իսրայելին մեղադրել են բյուրոկրատական ընթացակարգերի միջոցով Գազայի հատված հումանիտար օգնության մատակարարումները խոչընդոտելու և սնունդ մատակարարող ավտոշարասյուների անվտանգությունը պատշաճ կերպով չապահովելու համար։
