Ավանեսյանը նորմալ է համարում Թորոսյանի քննադատությունները

ՀՀ առողջապահության նախարար Անահիտ Ավանեսյանն անդրադարձել է փոխնախարարի պաշտոնում Լևոն Հակոբյանի նշանակմանը, գրել է Radar Armenia-ն։

Հակոբյանը փոխնախարարի պաշտոնից ազատվել էր Արսեն Թորոսյանի օրոք, բայց հիմա վերանշանակվում է․ հարցին՝ սա նախկին ու ներկա նախարարների միջև հակասության արդյունք չէ՞, Ավանեսյանը պատասխանել է. «Պարոն Հակոբյանը իր դիմումի համաձայն է ազատվել․ այստեղ որևէ խնդիր չկա։ Լինում է, երբ մարդն ազատվում է աշխատանքից, հետո որոշ ժամանակ անց նշանակվում պաշտոնի»։

Ավանեսյանը նշել է, որ Հակոբյանը վերջին ամիսներին եղել է իր խորհրդականը. «Հաշվի առնելով նրա կատարած աշխատանքն այս ընթացքում՝ գնահատել եմ, որ իր գիտելիքներն ու փորձառությունն այս պահին մեզ անհրաժեշտ են»։ 

Նախարարը նաև շեշտել է, որ առաջնորդվում է իր օրակարգով և առողջապահության  համակարգի բարելավման հեռանկարով։ Հարցին՝ ինչո՞ւ է Արսեն Թորոսյանն իրեն միշտ թիրախավորում, նա ասել է, որ նման բան չի նկատել․ «Գրառումներին հետևում եմ, գործընկերային են։ Լինում են քննադատություններ, որն էլի շատ նորմալ է»։