Եվրամիությունը Վրաստանի իշխանություններին նախազգուշացրել է հեռու մնալ «Օտարերկրյա ազդեցության թափանցիկության մասին» օրենքի ընդունումից և կոչ է արել պահպանել ժողովրդավարության առաջմղման պարտավորությունները, ասված է Վրաստանում ԵՄ ներկայացուցչության հայտարարության մեջ։
«ԵՄ-ն ցավում է, որ այս հարցը կրկին քննարկվում է՝ չնայած 2023 թվականի մարտին հասարակական և միջազգային ուժեղ արձագանքին։ Քաղհասարակության կազմակերպությունների համար բարենպաստ միջավայրի ստեղծումն ու պահպանումը և ԶԼՄ-ների ազատության ապահովումը ժողովրդավարության հիմքում են: Դա նույնպես վճռորոշ նշանակություն ունի ԵՄ- ին անդամակցության գործընթացի համար», – ասված է հայտարարության մեջ։ Եվրամիությունը հիշեցնում է, որ Վրաստանը համայնքին անդամակցելու թեկնածուի կարգավիճակ է ստացել բարեփոխումների անցկացման պայմանով: Հանձնարարականները վերաբերում էին, մասնավորապես, քաղաքացիական հասարակության ազատ աշխատանքի ապահովմանը, ինչպես նաև հակաեվրոպական ապատեղեկատվության դեմ պայքարին:
