Անկախ պետությունների համագործակցության (ԱՊՀ) երկրների, այդ թվում՝ Հայաստանի, Ադրբեջանի և Տաջիկստանի զինված ուժերի ներկայացուցիչները մասնակցում են Մոսկվայում ընթացող գլխավոր շտաբների պետերի կոմիտեի նիստին, հայտնել է ՌԴ պաշտպանության նախարարությունը։
Նիստի ընթացքում Ռուսաստանի գլխավոր շտաբի պետ Վալերի Գերասիմովը գործընկերներին տեղեկացրել է, որ նախորդ նիստին հաջորդած ժամանակահատվածում կոմիտեի կազմում փոփոխություններ են տեղի ունեցել․ Ղազախստանի պաշտպանության նախարարի առաջին տեղակալ, ԶՈՒ գլխավոր շտաբի պետ է նշանակվել Սուլթան Քամալետդինովը, իսկ Ղրղզստանի պաշտպանության նախարարի առաջին տեղակալ, ԶՈՒ գլխավոր շտաբի պետ է դարձել Ռուսլան Մուկամբետովը։
Գերասիմովը ներկայացրել է նաև նիստի մյուս մասնակիցներին` Ադրբեջանի պաշտպանության նախարարի առաջին տեղակալ, ադրբեջանական բանակի գլխավոր շտաբի պետ Քերիմ Վելիև, ՀՀ ԶՈՒ ներկայացուցիչ Արտակ Տոնոյան, Բելառուսի ԶՈւ գլխավոր շտաբի պետ, պաշտպանության առաջին փոխնախարար Վիկտոր Գուլևիչ, Տաջիկստանի պաշտպանության առաջին փոխնախարար, ԶՈՒ գլխավոր շտաբի պետ Էմոմալի Սոբիրզոդա, Ուզբեկստանի պաշտպանության առաջին փոխնախարար, ԶՈՒ գլխավոր շտաբի պետ Շուհրատ Խալմուհամեդով։
Նիստի մասնակիցները քննարկել են անօդաչու թռչող սարքերի դեմ պայքարի ժամանակակից մեթոդները և հատուկ ռազմական օպերացիաների ժամանակ ականազերծման փորձը։
Նիստի մասնակիցները որոշումներ են ստորագրել՝ ուղղված ռազմական ոլորտում բազմակողմ համագործակցության համակարգի զարգացմանը։
