Ռուսաստանի տարբեր շրջաններ գիշերը զանգվածային գրոհի են ենթարկվել։ ՌԴ պաշտպանության նախարարությունը հաղորդել է, որ 44 անօդաչու թռչող սարք խոցվել է Ռոստովի մարզում, մեկը՝ Սարատովի մարզում:
Ըստ ՌԴ ռազմական գերատեսչության, 6 ԱԹՍ խոցվել է Կրասնոդարի երկրամասում և մեկական՝ Կուրսկի և Բելգորոդի մարզերում։
Կուրսկի վարչակազմը հաղորդել է, որ ուկրաինական գրոհների հետևանքով ամբողջությամբ այրվել է սեփական բնակելի տուն։
Սարատովի մարզի նահանգապետը հայտնել է, որ Էնգելս քաղաքում, որտեղ տեղակայված են ռուսական ծանր ռմբակոծիչներ, անօդաչու թռչող սարքերը ոչնչացվել են։ Տուժածներ և ենթակառուցվածքների ավերածություններ չկան:
BBC-ի ուկրաինական ծառայության աղբյուրները հայտնել են, որ Ուկրաինայի անվտանգության ծառայության հարձակման հետևանքով Ռոստովի մարզի Մորոզովսկ աէրոդրոմում ոչնչացվել է 6 ինքնաթիռ։
Իսկ Ուկրաինայի զինված ուժերից հայտնել են, որ գիշերը Ռուսաստանը 13 ԱԹՍ է արձակել երկրի տարածքի վրա, և բոլորը խոցվել են։ Ըստ ռազմաօդային ուժերի՝ ԱԹՍ-ները խոցվել են Զապորոժիեի, Օդեսայի և Դնեպրոպետրովսկի մարզերում։ Ռուսական ուժերը նաև Բելգորոդի մարզից արձակել են 2 զենիթային կառավարվող հրթիռ և 3 բալիստիկ հրթիռ։ Հրթիռային հարվածների հետևանքների մասին չի հաղորդվում։
