ՀՀ կառավարությունը հավանություն է տվել Հայաստանի և Ղազախստանի կառավարությունների միջև միջազգային ավտոմոբիլային հաղորդակցության մասին 2006 թ․ նոյեմբերի 6-ի համաձայնագրում փոփոխություններ և լրացումներ կատարելու մասին արձանագրության ստորագրման առաջարկությանը: Հարցը ներառված էր չզեկուցվող հարցերի փաթեթում։
Նախագծի հիմնավորման մեջ նշված է, որ ներկայումս երկու երկրների միջև բեռնափոխադրումների իրականացման ոլորտում առկա է խնդիր՝ կապված ճանապարհային և բնապահպանական հարկերի գանձման օրենսդրական կարգավորումների հետ։
«Խնդրի լուծման նպատակով անհրաժեշտություն է առաջացել փոփոխություններ կատարել համաձայնագրում, որը կկանոնակարգի երկու երկրների միջև մի կողմի պետության տարածքում գրանցված տրանսպորտային միջոցները մյուս կողմի պետության օրենսդրութամբ նախատեսված հարկերից ու վճարներից ազատման արտոնությունների սահմանման գործընթացը:
Վերոնշյալ խնդրի կարգավորման նպատակով մշակվել է Հայաստանի և Ղազախստանի կառավարությունների միջև միջազգային ավտոմոբիլային հաղորդակցության մասին համաձայնագրում փոփոխություններ և լրացումներ կատարելու վերաբերյալ արձանագրության նախագիծը, որով փոփոխություններ են կատարվում համաձայնագրի 2-րդ, 5-րդ և 11-րդ հոդվածներում, ինչպես նաև ճշգրտվում են հայկական և ղազախական կողմերի լիազոր մարմինների անվանումները։
Համաձայնագրի փոփոխությունը հնարավորություն կտա դյուրացնել երկու երկրների միջև ավտոմոբիլային տրանսպորտով ուղևորափոադրումների և բեռնափոխադրումների գործընթացը, բարձրացնել Հայաստանի տարանցման դերը տարածաշրջանում բեռնափոխադրումների կազմակերպման հարցում»:
