«Կամուրջ» մշակութային կենտրոնն ապրիլի 27-ին Կարեն Դեմիրճյանի անվան մարզահամերգային համալիրում կանցկացնի պարի «Ծաղկունք» միջազգային 5-րդ փառատոնը, որը նվիրված կլինի ապրիլի 29-ին նշվող Պարի միջազգային օրվան։
Կամուրջ» մշակութային կենտրոնից «Արմենպրես»-ին տեղեկացրել են, որ փառատոնի նպատակը, մեկ միասնական հարթակում միավորելով, ներկայացնելն է աշխարհի տարբեր ազգերի պարերը՝ Հայաստանի ու արտերկրի մանկապատանեկան և երիտասարդական խմբերի միջոցով։
Փառատոնն իրենց մասնակցությամբ կգեղեցկացնեն Հայաստանի, Ֆրանսիայի, Ստասբուրգ և Լիոն քաղաքների, Վրաստանի, Լեհաստանի ու Ուկրաինայի մի շարք պարային համույթներ, անսամբլներ և երգչախմբեր։ Փառատոնին ներկա կգտնվեն նաև սիրված և ճանաչված երգիչներ Հայաստանից:
Նշվում է, որ «Կամուրջ» մշակութային կենտրոնը մշտապես միտում ունի նպաստելու պարարվեստի հանրայնացմանը:
«Պարը մշակութային հաղորդակցման լեզու է, ազգային մշակութային արժեք: Այն արվեստների յուրօրինակ համադրում է։ Պարի միջոցով մարդիկ փոխանցում են իրենց զգացողությունները, հույզերը, ուրախությունը, ոգին, նաև ազգի մտածողությունն ու մշակույթը, մղում ինքնաճանաչման, ազգային արժեքների բացահայտման՝ կամրջելով տարբեր աշխարհագրությունների մշակույթներ, ստեղծելով փոխճանաչման հիմքեր: Այն արվեստի միասնական ձև է, որը չի ճանաչում քաղաքական, էթնիկ, մշակութային որևէ սահման: Պարը զորեղ միջոցներից է` ներաշխարհի հարստացման, ինքնաճանաչման և ազգը համախմբելու առումով»,- ասված է հաղորդագրության մեջ:
