Թուրքիայի արտգործնախարարությունը X-ի (Twitter) սոցիալական հաշվում կատարած գրառմամբ տեղեկացրել է, որ գերատեսչության ղեկավար Հաքան Ֆիդանն Անկարայում ընդունել է ԱՄՆ պետքարտուղարության վարչական և քաղաքական հարցերով փոխքարտուղար Ջոն Բասսին, փոխանցում է «Էրմենիհաբերը»:
Դիվանագիտական աղբյուրների համաձայն՝ հանդիպմանը քննարկվել են Թուրքիայի նախագահ Ռեջեփ Թայիփ Էրդողանի ԱՄՆ կատարելիք այցի նախապատրաստական աշխատանքներին վերաբերող հարցեր:
Բացի դրանից, մտքեր են փոխանակվել տարածաշրջանային վերջին զարգացումների, Գազայում տիրող իրավիճակի, Սիրիայում և Ուկրաինայում տիրող իրավիճակի շուրջ:
Անդրադարձ է կատարվել նաև Սև ծովում առկա անվտանգային հարցերին:
Օրակարգից դուրս չեն մնացել նաև էներգետիկ ոլորտին և ահաբեկչության դեմ պայքարին վերաբերող հարցերը:
Թուրքիայի փոխարտգործնախարար Բուրաք Աքչափարի հրավերով Թուրքիա մեկնած Բասսն իր այցը կավարտի ապրիլի 16-ին: Մինչ այդ նախատեսվում են մի շարք հանդիպումներ:
