Հնդկաստանում մեկնարկել են խորհրդարանի ստորին պալատի՝ Լոկ սաբհայի ընտրությունները, որոնք կտևեն մեկուկես ամիս։
Ապրիլի 19-ին անցկացվում է ընտրությունների 7 փուլերից առաջինը։ Քվեաթերթիկների հաշվարկը տեղի կունենա հունիսի 4-ին։
Հնդկաստանն ունի 968 միլիոն ընտրող՝ ավելի, քան ԱՄՆ-ի, Եվրոպական Միության և Ռուսաստանի բնակչության թիվը միասին։Ապրիլի 19-ին կքվեարկեն 166 միլիոն ընտրողներ երկրի 21 նահանգներում և տարածքներում։
Կգործի ավելի քան մեկ միլիոն ընտրատեղամաս։ Իրենց թեկնածուներին կներկայացնեն ավելի քան 2400 քաղաքական կուսակցություններ։
543-տեղանոց Լոկ սաբհայում բացարձակ մեծամասնություն կազմելու համար հարկավոր է ստանալ 272 մանդատ։Ըստ կանխատեսումների՝ Հնդկաստանի վարչապետ Նարենդրա Մոդիի «Հնդկաստանի ժողովրդական կուսակցությունը» (BJP – Bharatiya Janata Party) կուսակցությունը խորհրդարանի ստորին պալատում կստանա 370 տեղ, իսկ նրա Ազգային ժողովրդավարական դաշինքը՝ ավելի քան 400։
