Հայոց ցեղասպանության տարելիցին ընդառաջ՝ ԱՄՆ Մասաչուսեթսի նահանգի Ներկայացուցիչների պալատի դահլիճում կազմակերպվել է հարգանքի տուրքի արարողություն ի պատիվ ցեղասպանությունը վերապրած 109-ամյա Մերի Վարդանյանի. ընթացիկ տարվա օգոստոսին նա կդառնա 110 տարեկան։
«Արմենպրես»-ը, վկայակոչելով CBS News-ը, հաղորդել է, որ Մերի Վարդանյանն արժանացել է Մասաչուսեթսի Ներկայացուցիչների պալատի պատվավոր հյուրի կոչմանը՝ նահանգում հայկական մշակույթի պահպանման և հայ համայնքում իր ներդրման համար:
Աղբյուրի տեղեկատվությամբ՝ Ճամայկա Փլեյնում բնակվող Վարդանյանը նահանգային ներկայացուցիչների պալատ է հասել Բոստոնի ոստիկանության հատուկ ուղեկցությամբ:
Մերի Վարդանյանի ընտանիքը հայտնել է, որ նա ծնվել է Հայոց ցեղասպանության ժամանակ, որից մազապուրծ նրա ընտանիքը սկզբում հասել է Սիրիա, այնուհետև՝ Լիբանան, իսկ 1970-ականներին տեղափոխվել ԱՄՆ:
Միջոցառմանը հնչել է ՀՀ պետական օրհներգը: Ելույթ են ունեցել նահանգային սենատորներ, որոնք բարձր են գնահատել Մերի Վարդանյանի ավանդը հայկական մշակույթի պահպանման գործում: Օրենսդիրներից ոմանք կրել են Հայոց ցեղասպանությունը խորհրդանշող անմոռուկը:
