Ապրիլի 22-ին Բուդապեշտի Պետեր Պազմանի անվան համալսարանում տեղի է ունեցել հուշ-երեկո՝ նվիրված Հայոց ցեղասպանության 109-րդ տարելիցին։ Միջոցառումը կազմակերպել էր Հունգարիայում ՀՀ դեսպանությունը, Պետեր Պազմանի անվան համալսարանը և Հունգարիայի հայկական ինքնավարությունը։
Հուշ-երեկոյին մասնակցել են Հունգարիայի պետական գերատեսչությունների ներկայացուցիչներ և Ազգային ժողովի պատգամավորներ, Հունգարիայում հավատարմագրված դեսպաններ և դիվանագիտական կորպուսի ներկայացուցիչներ, Հունգարիայի գիտական, հասարակական և մշակութային գործիչներ, հայ համայնքի ներկայացուցիչներ։
Հյուրերին ուղղված ողջույնի խոսքով հանդես է եկել համալսարանի պրոռեկտոր Վինչզե Քրիշտիանը (Vincze Krisztián), ելույթներ են ունեցել Հունգարիայում ՀՀ դեսպան Աշոտ Սմբատյանը և Հունգարիայի հայկական ինքնավարության նախագահ դոկտոր Չարան Իշտվանը (Czárán István), որից հետո գերմանացի պատմաբան Միխայել Հեզեմանը (Michael Hesemann) հանդես է եկել Հայոց ցեղասպանության վերաբերյալ Վատիկանի արխիվներում պահվող նյութերի թեմայով բանախոսությամբ։
Իր խոսքում ՀՀ դեսպանը, ոգեկոչելով Հայոց ցեղասպանության անմեղ զոհերի հիշատակը, ընդգծել է պատմական փաստերի ճանաչման և դրանց հետ առերեսման նշանակությունը՝ ապագայում ցեղասպանությունների և մարդկության դեմ ուղղված այլ հանցագործությունների կանխման և խաղաղ ու փոխվստահության վրա հիմնված համատեղ ապագայի կառուցման համար։
Երեկոյի ընթացքում երաժշտական կատարումներով հանդես է եկել Վիեննայից հրավիրված քառյակը՝ սոպրանո Թեհմինե Շեֆերի (Tehmine Schaeffer) գլխավորությամբ։
